“Para mudar o mundo, primeiro é preciso mudar o xeito de nacer”
Esta mítica frase de comezo dos 80 é de Michel Odent. Por desgraza (tamén chamada incompetencia neste caso), non temos datos daquel entón, nin da actualidade, para comparar rigurosamente a situación 40 anos despois. Agora ben: facede repaso dos vosos nacementos, dos das vosas crianzas e das que vos rodean. Vedes cambios significativos? Non falamos duns meses, nin dun par de anos: ¡estamos a falar de catro décadas, e o nivel de violencia co que seguimos a recibir ás crianzas neste mundo segue a ser insoportable!
Si, violencia: Programar inducións e/ou cesáreas por protocolos obsoletos e sen ningunha evidencia científica cando mamá e bebé están ben é violencia, non respectar a intimidade no parto con entradas e saídas de persoal diverso e facendo tactos innecesarios é violencia, a maniobra Kristeller é violencia, episiotomías por protocolo e sen información nin consentimento son violencia, non tratar con respecto e cuestionar a nosa capacidade de parir e a capacidade das nosas crianzas para nacer é violencia, separar a bebés e mamás cando ningunha das dúas vidas corre perigo é violencia... e xa basta!
Protexamos este momento único nas nosas vidas. Só sentíndonos respectadas dende o primeiro momento, poderemos comezar o noso camiño dende a calma, a seguridade e o amor, evitando así consecuencias fatais que nos acompañen de por vida. Só así poderemos mudar este mundo. Matronas, o mundo precisa de vós!
Compartímosvos este decálogo de dereitos que recolle a Plataforma Pro Dereitos do Nacemento:
Dereito a que se recoñeza a súa capacidade física e emocional, na súa vida intrauterina e extrauterina, e especialmente no tránsito entre ambas.
O bebé intraútero ten dereito a que o benestar emocional da súa nai non sexa alterado por un abuso e exceso de controis na xestación.
Dereito a que o NACEMENTO comece de xeito espontáneo.
Dereito a que se respete a intimidade, ritmo, ambiente e compañía no parto-nacemento e a que o mesmo transcurra de xeito fisiolóxico.
Dereito a permanecer en contacto pel con pel coa súa nai .
Dereito a que o cordón umbilical remate de trasvasar todo o sangue do bebé.
Dereito a ser amamantada a demanda, polo que é fundamental que a nai conte con axuda e apoio á instauración da lactancia materna.
Dereito a ser acompañada TODO o tempo. Por exemplo, que se realicen as probas médicas necesarias en compañía da súa nai, pai ou persoa de confianza, se é en contacto pel con pel, mellor.
O bebé ten dereito a ser atendido persoalmente pola súa nai, pai ou persoa que a súa familia escolla, como mínimo, durante o primeiro ano de vida.
O bebé prematuro ten dereito a permanecer pegado ao corpo da súa nai, pai ou persoa que elas escollan ata que adquira o peso e as condicións óptimas de saúde, polo que as unidades neonatais deben estar adaptadas para poder ingresar ao binomio nai-bebé. Dereito ao MÉTODO NAI CANGURO.
Dende a Asociación Pediatras e Matronas Xa, apoiamos a defensa absoluta dos Dereitos do nacemento. España está denunciada por diversos organismos por non contar, aínda hoxe, con prácticas suficientemente respectuosas neste sentido.
Máis matronas son necesarias, xa que é a única compaña útil nos partos naturais e, quizàis, o colectivo sanitario más comprometido cos dereitos do nacemento.
Defendamos os nosos dereitos!
Comentarios
Publicar un comentario