A Fundación Crecer Jugando, xunto coa Asociación Española de Fabricantes de Juguetes e as entidades, empresas e organizacións encadradas dentro do ámbito da infancia propoñen ao Goberno declarar o 26 de abril como o “Día do Neno e da Nena”.
A iniciativa, trata de eloxiar e homenaxear o comportamento das nosas crianzas nunha situación de vulnerabilidade como a que está a supoñer a crise sanitaria actual.
Dende a Asociación Pediatras e Matronas Xa, queremos unirnos a este recoñecemento, e celebración, da valentía dunhas crianzas que foron, e continúan a ser heroes e heroínas nunha situación tan complicada como esta pandemia, na que son un gran exemplo a seguir polo resto da sociedade en canto a adaptación, paciencia, alegría, e seguimento das normas.
E, como tal,
queremos, tamén, lembrar que eles e elas
son un dos piares da nosa loita . Que a
infancia ten dereito á protección e coidado por parte de tódalas persoas e
institucións, e debe ser a prioridade para un país. Así o reclamamos dende
a asociación a un Goberno que está deixando desprotexido o noso máis prezado
tesouro, o noso futuro. Protexan a saúde dos nosos pequenos e pequenas!
O 26 de abril será xa, sempre, o aniversario da data na que os nenos e nenas voltaron sair ás rúas, despois de ficar en confinamento durante 42 días. Resultou admirable o xeito no que encararon este peche obrigado, a súa valentía e saber estar. Se todos tivemos que adaptarnos a unha situación estraña, os nenos e nenas foron capaces de facelo dun xeito innato.
A situación xerada pola crise sanitaria permitiunos ser conscientes, no ámbito das crianzas, da importancia do xogo, do benestar dos nenos e nenas, da súa sociabilidade e interactuación co entorno.
As crianzas son como lenzos en branco que empezan a ser pintados. Temos que ser conscientes diso, conscientes da súa permeabilidade . Debemos protexer a infancia e ensalzar a súa importancia nas estruturas sociais, e na vida en sí.
“A única patria que tén un home é a súa infancia” Rainer María Rilke;
É preciso protexer esa patria, nós temos as ferramentas para facelo. A proposta deste día conciéncianos a todos deste feito, e sobre todo, da necesidades de mellorar o entendemento e empatía cos nosos fillos e fillas. Sempre estamos a tempo de comprender, xogar, sentir e ser.
COA SAÚDE NON SE XOGA
Comentarios
Publicar un comentario